From Nagpakabanang katawhan
Ang pagpanghatag sa ESA sa Brgy. Sto. Nino nga gitakda kagahapon, Huwebes, Septyembre 10, 2015, mao ang pinakagubot ug pinakasamok. Ngano nahitabo man kini nga kagubot? Mao kini ang mga rason:
1. Wala magkadimao nga pagpanglista sa mga tukma nga makadawat sa ESA. Matud pa sa impormasyon nga nasagap, mitug-an kining pangalan ug Sharon, barangay day care worker sa Sto. Nino, sa dihang gisulong ug giulan na siya sa mga reklamo gikan sa wala mahilakip nga mga lumolupyo nga apil sa orihinal nga iya nalista, miabot ug 267 apan sa pinal nga lista sa hataganan, 90 na lamang. Mitug-an pnd kini nga babaye nga adunay mga opisyal sa iya barangay ug empleyado sa DSWD-Naval nga mihashas ug miiban sa mga tawo nga mahilakip unta nga makadawat. Apan, nahibaw-an sa pinal nga lista nga wala pa gihapon mamao o matukma kay sa pinal nga lista, naapil ang pangalan sa day care worker nga matud pa wala daw manag-iya ug balay. Aduna pod nahilakip sa lista nga wala pod maguba ang balay sa bagyong Yolandaug daghan pa nga mga nahilakip sa lista nga wala maberipika kung angayan ba gayud siya makadawat sa hinabang pinasubay sa patakaran sa ESA.
2. Ang wala pagkaapil sa lista sa tinud-anay nga nagub-an gayud sa bagyong Yolanda. Daghan ang nasuko ugnagbagutbot tungod ani nga wala mamao nga pagpanglista sa ESA. Ang pangutana, ngano nga gipanangtang man ang 177 nga makadawat pod unta sa ESA nga wala man lamang pahibaloa nga gitangtang sila ug sa unsa nga rason nga gitangtang sila? Asa naman ang hustisya ug kaangayan niini? Nag-unsa man diay ang mga opisyales sa barangay nga karon raman sila nakahibalo niini? Ug tinuod man nga may mga opisyal sa barangay ug empleyado sa DSWD nga mihagpat sa orihinal nga lista, ngano wala nila tag usa usaha ang gipangtang-tang pagpahibalo ug pagpasabot nga gitangtang sila aron dili na unta moabot.Pwede ba diay makabuot ang mga opisyal sa barangay sa nadawat nga ESA? Unsay ila gipasikaran niini nga sumbanan o balaud? Dili ba kini nga ilang gibuhat usa ka dakong kalapasan?
3. Ang pagsaad nila nianang pagmeeting nga wala matuhay sa adlaw nga Miyerkules sa mga lnmulopyo sa barangay nga paadtuon sa munisipyo kay makadawat gihapon sila bisan wala sila didto sa lista, mao ang nakadugang sa gubot. Ngano gilingla man sa mga opisyal ang mga lumolupyo sa barangay pagpanagdto sa munisipyo nga bisan sila mismo nakasabot nga dili gyud sila matagaan kay wala sila mahilakip sa 90. Kagahapon, nagminghoy ang kadaghanan nga mingadto kay mga ala una na lang sa hapon nga paghinuwat, wala gyud silay nadawat ug gipanggutman pa gyud paghinuwat sa mga gisaad sa mga opisyal sa barangay nga wala matuman.
4. Kagahapon, may nagsumat nga may usa ka empleyadong babaye sa munisipyo nga taga barangay Sto. Nino nga man usab Ang nangusog nga bahin-bahinon na lang. Gani ang didtn sa lista nakapirma na pero wala pa irelease sa ila ang kwarta tungod sa maong kasamok ug nga sundon daw ang gikasabutan nga gipirmahan lang sa usa ka notebook. Ensakto ba ni nga paagi? Nahisubay ba ang pag interbener sa usa ka empleyado sa munisipyo bahin sa ESA?
5. Karong buntaga, gikatakda daw ang paghatag na sa ESA sa taga Sto. Nino ug ang mahitabo unya nga may mga opisyal sa barangay nga katapos ug dawat sa sobre sa atua sa 90 nga may sulod na nga kwarta sa ESA, pugngan sila ug paadtuon sa barangay hall aron daw bahinon ang kwarta. Makatarunganon ug tukma ba sa sumbanan sa ESA ang pagabuhaton sa mga opisyal sa barangay? Dili ba ni dakong kalapasan sa balaud? Ensakto ba tong gibuhat sa usa ka empleyadong babaye sa munisipyo nga taga barangay nga nag-interbener siya sa pagpanghatag sa ESA?
6. Tungod sa mga sayop nga nabuhat sa mga opisyal sa barangay mao ang dakong hinungdan niini nga kagubot. Ang usa ka sayop, dili pwede masulbad pinaagi paghimo ug lain pod nga sayop. Ang pagbuhat sa mga opisyal sa barangay nga pagsulbad sa problema, nakapasamot hinuon ug nakahimo ug nakapanganak pa ug dakong problema. Ang sayop nga nabuhat sa mga opisyal sa barangay gusto nila tabunan apan sa sayop nga paagi. Kung ila pa ni gihatagan ug solusyon nga pinasubay sa tukma ug nahasubay sa balaud nga pamaagi, dili unta moabot niini nga pagkagubot. Kadtong gusto makakita sa mahitabo unya sa mga makadawat sa ESA sa Sto.Nino, saksihi ug sundi karong buntag ang mga panghitabo sa munisipyo ug ang didto sa barangay hall sa Sto. Nino aron masaksihan ang mga kahiwian nga gibuhat sa mga opisyal sa Brgy. Sto. Nino. Ang inyong pagpakabana dako ug ikatampo sa katunhayan ug kahapsay sa pag-implementar sa ESA sa gobyerno nga mahipunta unta sa tukma ug angayan nga modawat sa ESA.
Para kang juan, ihatag kang juan ug ang para kang pedro ihatag pod para kang pedro. Ang mga nakasala kinahanglan manubag ug pagasilotan ug pagahukman pinasubay sa mga sumbanan ug mga balaud nga gipatuman sa gobyerno. #ESA
The post Ang mga hinungdan sa kagubot sa paghatag sa ESA sa Brgy. Sto. Nino appeared first on Biliran Blogs.